Kulturikkut kingornussassat pillugit siunnersuisoqatigiit

Kulturikkut eriagisassat eqqissisimatitaanerat pillugu Inatisartut inatsisaat nr. 18, 19 november 2007-imeersoq naapertorlugu susassaqarfiusumi Naalakkersuisunut ilaasortaq Kulturikkut kingornussassat pillugit siunnersuisoqatigiinnik pilersitsissaaq ukiuni sisamani atuuttussanik. Suliassaat §16 imm. 2-mi allaaserineqarput. §17 naapertorlugu kulturikkut kingornussassat pillugit siunnersuisoqatigiit eqqissisimatitassanngortitsiniarnermi  suliani  innersuussuteqartassapput aammalu §14 naapertorlugu akuersissutinut atatillugu tusarniaavigineqartassallutik. Taakku saniatigut illutoqqanik kulturikkullu oqaluttuarisaanermi sumiiffunnut pingaarutilinnut eqqissisimatitassanngortitsiniarnermi suliassanullu allanut taakkununnga assingusunut siunnersuisutut inissisimassapput. Siunnersuisoqatigiit 2009 ukiakkut pilersinneqartut 2011-mi ima inuttalerneqarput:

Thomas Riis, arkitekti MAA nunatsinni illussanik titartaanermi arlalinnik peqataasarsimasoq
Jakob Janussen, scient. Pol.; Namm. Oqartussani assigiinngitsorpaalunni pisortaaffeqartarsimasoq.
Marianne Petersen, Nunatta Katersugaasiviani Allagaateqarfianlu katersugaasivilerisuusimasoq.

NKA siunnersuisoqatigiinnut naminerisaminnik aningaasaateqartinneqanngitsunut allatseqartitsivoq. Ukiumut 2010-mut NKA 1.2 millioninik aningaasaliiffigineqarpoq kulturikkut eriagisassanut eqqissisimatitanut suliaqarnermut tamakkiisumik atugassarititaasunik.
Nunatta Katersugaasivia pisussaavoq privatinut pisortanilu oqartussanut eqqissisimatitsinermi sulianik siunnersuissalluni sulianullu tamakkununnga tunngasunik apeqquteqarfigineqarsinnaassalluni. Kulturikkut kingornussat pillugit siunnersuisoqatigiit nalinginnaasumik sulianut ilanngunneqartussaasarput NKA ingerlatsinermut inatsimmut attuumassutilinnik aalajangiisussaatillugu imaluunniit naliliinerit kulturikkut eriagisassanik suliaqarnermi aalajangiisuusinnaasut pisussaatillugit, imaluunniit NKA siunnersorneqarnissamik pisariaqartitsippat.

Kulturikkut eriagisassanut angigaasaliissutit
Kulturikkut eriagisassanut aningaasaliissutit kulturikkut kingornussat pillugit siunnersuisoqatigiit ingerlanerat matussusertussaavaat siunertanullu ukununnga atorneqassallutik:
§ 8 imm. 2 naapertorlugu Nunatta Katersugaasiviata itsarnitsat eriagisassat nunami aalaakkaasut inatsit una naapertorlugu eqqisssisimatitaasut nakkutigisassarai.
Imm. 3. Itsarnitsat eriagisassat nunami  aalaakkaasut pingaarnersaasa aningaasanut inatsip aningaasaliissutaata periarfissiinerata iluani aserfallatsaalinissaat pissussaafigaa.
§ 14 imm. 3. Qinnuteqartoqareernerata kingorna Nunatta Katersugaasivianit Allagaateqarfianiillu aalajangiisoqarsinnaavoq aserfallatsaaliinermut imaluunniit illup eqqissisimatitap allatut suliarineranut imaluunniit sumiiffimmi kulturikkut oqaluttarisaanermi pingaarutilimmi sulianut aningaasartuutaasimasut aningaasanut inatsikkut aningaasaliissutigineqartunik  tamakkiisumik ilaannakortumilluunniit matussuserneqarsinnaaneranik.
§ 15 imm. 2. Illut sumiiffiillu kulturikkut oqaluttuarisaanermut pingaarutillit inatsit manna naapertorlugu eqqissisimatitaasut Nunatta Katersugaasivianit nakkutigineqarput.
Imm. 3. Illut sumiiffiillu kulturikkut oqaluttuarisaanermut pingaarutillit aserfallatsaalineqarnerat Nunatta Katersugaasiviata aningaasanut inatsip aningaasaliissutaata periarfissiinerata iluani aserfallatsaalinissaat pissussaafigaa
Aserfallatsaalisassat amerlaqimmata suliassanik sukangasumik tulleriissaarinissaq pisariaqarluinnarpoq.
Illutoqqat eqqissisimatitat (§14) suliarinissaanut aningaasanik qinnuteqaatit NKA-mut nassiunneqassapput. Skemamik immersugassaqanngilaq.